所謂棒打出頭鳥，響中國官場行走，行事太高調矚目，好易出事，工聯會訪京見領導人大計臨尾泡湯，就係最佳材。話說工聯會響上月二十二日抵京，中聯辦派行程表時，白紙黑字寫住二十四日晚有「重要活動」，點知到日先至臨時「換行程」，一班工聯阿頭無奈之餘，亦只能夠怨句事前太高調。據聞工聯事先張揚見曾慶紅後，中聯辦備受壓力，惟有取消「節目」，一了百了囉。
「重要活動」變為普通宴請 工聯會會長鄭耀棠早前率領新領導班子，浩浩蕩蕩訪京，希望可以見到國家副主席曾慶紅，點知最後食詐胡。知情人士話，其實棠哥無大隻廣，工聯本來真係好有機會見到曾慶紅，皆因佢抵京第一日，中聯辦派發訪問日程表中，二十四日晚最後就有一項「重要活動」，節目內容可謂呼之欲出。
點知到二十四日早上，中聯辦突然「回收」行程表，改發另一張，「重要活動」變「中聯辦宴請」，發生乜大家心照不宣。
原來，棠哥同傳媒透露訪京消息之後不久，已經收到中聯辦訊息，提醒見領導人一事唔好咁高調，反映中聯辦備受壓力，到訪京期間，中聯辦仍極力為工聯爭取，點知埋門跣腳，工聯空手而回，中聯辦唔好意思，惟有請食晚飯補數，而棠哥當然好無癮，晚宴後無跟團返酒店，反而留響酒樓同中聯辦官員「傾偈」，並非如外界揣測，單獨見曾慶紅。
知情人士話，至今無人向工聯會解釋「死因」，但斷估係政治因素居多，大家試想想，幾個大政黨今年連領導人背脊都未見過，曾慶紅點可以只見工聯會？咁到底邊個向中央施壓？一個工聯會高層分析，收窄範圍，話一定唔係民建聯，因為工聯今次可以見到曾慶紅，民建聯下次訪京就一定都可以，民建聯無理由搞破壞。